«PAYNET» AJ HUMO’ning 100% davlat ulushini xususiylashtirish bo‘yicha savdolarda g‘olib bo‘ldi

«PAYNET» aksiyadorlik jamiyati O‘zbekiston Respublikasi Davlat aktivlarini boshqarish agentligi tomonidan tashkil etilgan «Milliy banklararo protsessing markazi» AJ (keyingi o‘rinlarda — HUMO) ustav fondidagi 100% davlat ulushini xususiylashtirish bo‘yicha savdolarda g‘olib deb topildi.

Kompaniya Jamiyatga tegishli bo‘lgan «Humo» to‘lov tizimining barqaror va uzluksiz faoliyatini ta’minlash, shuningdek, tizim foydalanuvchilarining maxfiy (shaxsiy va bank) ma’lumotlarini himoya qilishga qaratilgan qo‘shimcha chora-tadbirlarni amalga oshirish majburiyatlarini o‘z zimmasiga oldi.

«PAYNET» AJ halol raqobat tamoyillariga sodiqligini, milliy to‘lov tizimlarini rivojlantirish yo‘lida hamkorlikni kuchaytirish, ilg‘or moliyaviy va raqamli texnologiyalarni joriy etish orqali respublikada raqamli iqtisodiyot va tadbirkorlik rivojini rag‘batlantirish maqsadida to‘lovlarning yangi shakl va usullarini jadal joriy etishga intilishini bildiradi.

«Biz HUMO’ning to‘lov bozorining boshqa ishtirokchilari bilan sinergiyasi nafaqat mavjud yutuqlarni saqlab qolish, balki ularni yanada oshirish, bozordagi mavqeini mustahkamlash va uzoq muddatli maqsadlarni samarali amalga oshirish imkonini beradi, deb ishonamiz. Biznes-jarayonlarni takomillashtirish, mahsulot va xizmatlar turlarini kengaytirish hamda yangi texnologiyalarni joriy etish orqali kompaniyalar aholi va biznes uchun yanada sifatli, qulay va innovatsion yechimlarni taqdim eta oladi», — deya ta’kidladi «PAYNET» AJ Bosh direktori.